A armar Kerle 18.10.2023



De Schorsch hocket auf am Bänkle am Waldrand. Ar genießt die Stille ond frait sich am
Obendhimmel. A pastellfarbigs Rosa ond Lila verwandlet sich langsam in a tiefes, dunkles
Rot. De Horizont broitet sich wie a Fuierglut vor eam aus.
De ganz Himmel isch in wunderschöne Farba taucht, kleine Wolkebänder wearet vo dr Sonne,
die grad wie a rötlichar Ball schwerfällig untergange isch, in Orange ond Rot agleuchtet.
Jede Minute geit es andre Schattierunga, die ganze Wealt wandlet sich laufend: es isch a
ergreifendes, lautloses Schauspiel.

Do kut de Kare vorbei mit seim nuie Cabrio. Flott fehrt ar vor de Schorsch na ond hebt mit
am scharft Bremsar direkt vorm a.
D Scheibe hot ar radreht ond ar loht sei linke Hand lässig an dr Tür nahange. Auf dr Näs
drait ar a extra dunkle, verspieglete Sonnebrille. Drum sieht ar zwar fascht nix meh in dr
Dämmerung, aber ar lueget halt saucool aus.
Vom Fahrtwind sind d Hoor a bitzle verschtrublet, drum sieht ar reacht wild aus, de Kare. In
seine Ohre hot ar weiße Stöpsel dinna steacke, so wie die Junge es huitzedag alle hand.
Mibba im Auto hot ar an große Bildschirm aufklappt, auf deam alls in bunte Farba leuchtet
ond blinket.

"Servus Schorsch, was geht ab ?" froget ar locker drher. - "Was goht ? Ja, d Sonne halt do
hinda, drum bin i ja do, gell." De Schorsch isch vo deam coole Auftritt it begoischtret. Ar
hätt halt gean an riebige Obend ghet.
Aber de Kare hot a andres Bedürfnis, ar will iatz mit seinem nuie Equipment agea. "Do lue her,
Schorsch, i bi iatz ibrall voll auf Empfang ond ka streame, was i will, des isch mega. Grad
laufet bei mir aktuelle Nochrichtar, Schlagar, a Liveinterview, de Weatterbericht, Verkehrs-
meldunga ond die nuiescht Netflixserie gleichzeitig. Wenn i wott, kinnt i au live bei de Ein-
radweltmoischterschafta in Luxembourg drbei sei. I versumm oifach gar nix meh. In de Allgäu-
news krieg i au sofort mit, wer beim Schofkopfturnier in Grünebach grad gwonne hot oder wer
Schützekönig in Walzlings wore isch. All des krieg i direkt in mein Hifi-bluetooth-Hörar nei
gsendet, alls über Satellit, alls online. Ein Wahnsinn, gell ? Mei ganz Auto isch ans Internet
agschlosse, weltweit connected. Do saisch nix meh, ha ?
Auf meim Touchscreen ka i alls aluege, was i will ond drmit mi koinar drbei stört, ka i sogar a
Noisereduction eischalte, dann hör i vo Ussa gar nix meh, blos no auf de Ohrstöpsel. Do kasch
du mit m Bschittfass vorbeifahre, des merk i gar numma. I bi dann voll global fokussiert, des
lahmsiedige Allgäu ka mir dann de Buckel narutsche. "

De Schorsch sait nix, well ar d Hälfte scho gar it verschtoht, was der Kare do alls vo sich geit.
Ar schüttlet blos kritisch de Grind.
Ond de Kare isch no it fetig:"A spezielle Software ha i mir no uploade lau, die scannt alle Infos
in realtime ond schickt mr alle breaking news direkt auf meine Airpods, ad hoc, verschtohsch ?
Des isch doch super, gell!
Los, grad iatz kut die news rei, dass dr Kim vo Nordkorea sich goldene Pantoffel hot mache lau...
ond iatz, dass dr Polizeipräsident vo Nairobi, wo isch iatz Nairobi, mit ar fremde Frau im Spiel-
casino vo Mombasa gseah wore isch...des isch halt international, des isch kosmopolitisch, gell.
Ja, ond in Weilar hand se a Damenrad am Friedhof hinda gschtohle, so a Sauerei, ibrall Kriminelle
omanand...ja Schorsch, was duesch denn du grad do hussa am Bänkle ?"

"Mei, Kare, i lue mr die schiene Obendstimmung a, es isch so herrlich, so riebig, do am Waldrand.
Später komm i dann in d Sonne, wie allat."
De Kare moint: "Ganz schie langweilig, do rumhocke, also na, i lue mr de Sonneuntergang in dr
Karibik jederzeit online a, wenn i Luscht ha, im Youtube, ond an philosophische Podcast drzue.
Des kasch du natürle it. Bisch halt scho a armar Kerle, so ganz offline.
Aber mei, jedar wie n ar will. I due iatz no a bitzle rumcruise ond dann connectet mer eis in dr
Sonne, wenn i Zeit ha. Pfiet di!"

De Schorsch winkt m zue ond sait:"Woll, woll, bis nochhar, Kare." Dann genießt ar weiter de
Obend ond denkt sich no: "Wer isch iatz do wohl a armar Kerle ?" - I amole it!"