D Asylante


Schorsch trifft Melkars Egon vor dr Raiffeisebank. De Schorsch hot kaum
"Griesde" gsait, do legt de Egon los:
"Ja Schorsch, servus, mei, du bisch doch a guatar Kerle, grad so wie n i!
I ha ghert, du dätesch de Asylante allat gherig helfe, mei, des find i ja so
guet. Des isch doch so wichtig, dass ma deane arme Kerle hilft, gell.."
Schorsch: "Ja, mei, so viel mach i doch gar it..."

"Doch, doch, d Leit sagets au. Woisch, mir boide sind do auf dr gleich Welle-
länge, gell, i ha au a so groß Heaz für die Arme. Des isch so wichtig. Kommet
do vo Afrika ond kennet se bei eis rum ja gar it aus. Koinar lueget um se, do
sott d Regierung scho viel meh mache. Die Deppe do doba, die stopfet die Leit
blos bei eis nei ond land se dann alloi. Des isch doch allat de gleich Mischt.
Die do doba hand doch koi Ahnung vo deam, was vor Ort alls los isch. Wie s deane
Asylante bei eis dann goht, des isch deane wurscht. Do müsst ma no viel meh
mache, des deaf au riebig Geld koschte. It blos alls de faule Grieche hindanei
schiebe, woisch.

Aber au im Fleacke kümmret sich koinar um se, die Schwaze standet blos bled rum
ond wisset it, was se do sollet. Die Einhoimische gand gschwind vorbei ond dond so,
als ob se it do wäret. A Sauerei isch des, do sott dr Bürgermeischter au mol was
drgege mache. Woisch, des isch wichtig, dass ma sich um die arme Schluckar kümmret.
Die kennet ja au nix drfür, ond wer woiss, was die scho alls mitgmacht hand. I wills
gar it wisse....

Blos guet, dass es so Leit wie eis zwie geit, gell. I woiss des frei scho, i woiss
bescheid. Bisch a grundgutar Kerle, Schorsch, duesch ja so viel.
I dät ja au gean was mache, aber i ha ums verrecke koi Zeit. Bis i denn allat nochm
Schaffe vom Jogge hoimkomm, do bin i so fetig, dass i sofort an kiehle Woize brauch.
Und drnoch bin i für alls z miad. Ma hot s it oifach, gell.
Suscht dät i scho no meh mithealfe, gell, so isch it. S dät au it an de Koschte
scheitre,....sag mer mol so, wenn i so an Afrikanar beim Beck treaffe dät, i dät deam
doch glatt auf dr Stell a Butterbreazge spendiere, do kenn i nix.
Also, Schorsch, i muss weiter, zum Yoga. Mir Guete miesset zämethelfe, gell.
Pfied di!"