Koine Gschenker (04.12.2025)



Mir hand d Näs voll vo der Schenkerei
Drum lammers an Weihnächte grad mol sei
Do simmer alle mitnand oins:
A Gschenkle geit es huier koins

Des duet frei guet, des hot a Lascht mir gnomme
Mir wär eh für koin ebbs Gscheides komme
Ma hot alls, braucht nix, kauft an Kruscht
Des nimmt blos Platz weg, geit an Fruscht

Der Entschluss, der hot sich glohnt
I bleib vom ganze Stress verschont
Die paar Loibla bach i neabezue
Ond suscht ha i grad reacht viel Rueh

Über d Feschtdäg kommet d Kinder hoi
Auf die i mi doch jedsmol freu
Vor m Haus stoht dann meh alls voll Kärre
I bleib entspannt, nix ka mi störe

An Heilig Obend kennet mr endlich alle zämet sei
Doch jedar schtieret gschamig in sein Glühwei nei
A paar Loibla duet ma luschtlos easse
Die miese Stimmung kasch vergeasse

Do stoht oinar auf, goht naus, ma hört was schloife
Er schleppt Gschenker rei, glei ganze Häufe
Verschrocke springet alle auf ond rennet naus
Ond traget woile au no Päckla rei ins Haus

Ja, was isch denn des blos für a Gfrett
So viel Gschenker hammer no gar nie ghet!
I grins in mi nei, bleib in dr Rueh
Ond leg lässig meine Gschenker au drzue

Zmol lachet alle, sind meh locker
Freiet sich an Schal ond Socka
Auf die Gschenker zum verzichte
Goht an Weihnächte mitnichte!