Hoiße Luft 07.07.2023



D Mina hot ihr Leabe gleabt. Rauskomme isch nix drbei, blos hoiße Luft.
Se war nie zfriede, hot allat no meh welle, aber am End hot se gar nix ghet.
Blos hoiße Luft ond die isch iatz au no fut.
Drum pass auf, dass es dir it au so goht, wie dr Mina.

Se war jung ond hot an Freind hau welle. Se hot sich umglueget, wer denn für se in Froge komme
kinnt. Dann hot se oin gfunde, der ihr super neipasst hot. A freundlichar, nochgiebigar Kerle,
der brav alles gmacht hot, was se welle hot, was se eam agschaffet hot. An ordentliche Batze
Geald hot ar no khet, des war ihr natürle au wichtig, well se seal hot ja nix ghet.
Se isch deam nochegloffe ond hot n sich gschnappt. Se war stark ond überzeugend, hot n verführt
ond er isch brav hinter ihr her dacklet. Ar hot sich gschwind eilulle lau ond scho war alls klar.

So war se no it zfriede, se hot au a Kind welle, des macht a Fraid ond verbindet anand, hot se gmoint.
Er war ja it begoischtret, aber wie allat isch es so komme, wie sui welle hot: a Kind war onterweags.
A Weile war sche, aber dann hot r des au numma groicht. Se hot meh welle im Leabe, hot s Haus ond de
Gate gherig ausbaut ond sche gmachet. Er hot brav alls baut ond gschuftet, halt so wie sui es sich
gwünscht hot.
Aber d Mina war allat no it zfriede.

Dann hot se dean Guru kennegleanet, der hot ihr das wahre Glück, das wahre Licht verschproche, wie die
Gurus halt so dond. Ond do isch doch glatt d Mina, die wo suscht allat de Chef war, dann zmol zahm
wore ond hot alls gmacht, was de Guru gsait hot.
Se miasset zescht amole sich seal verbessre ond erleuchtet weare. Des sei it oifach, des braucht Zeit ond
an Kurs bei eam. Der wiad mindeschtens a Johr lang daure, bis ma reacht erleuchtet isch. Ond a bitzle a
Geald koscht des natürle au. Mit 500 im Monat bisch drbei, sait dr Guru ond d Mina isch ganz begeuschtret.
So loht sich all Wuche erleuchte ond zahlt brav ond pünktlich.
Se tanzt, meditiert ond trommlet die ganz Zeit, drmit die Erleuchtung denn kut. Es zieht sich na, se tanzt,
meditiert ond trommlet no meh ond meh ond zahlt brav weiter.
De Guru schickt Bilder vo ar Südseeinsel, wo ar mit so 20 junge Fraua wohnt ond fleissig meditiert.
Ar moint, des mit dr Erleuchtung dauret no länger, also meditiert d Mina weiter ond zahlt.

Die Aufgaba wearet größer, iatz gohts au dorum, dass ma d Wealt verbessre muss, se sogar vor m Untergang
rette muss, an Friede in d Wealt neimeditiere muss. Des braucht natürle Zeit ond weitre monatliche Zahlunga.
Noch am Johr fangt de Ukrainekrieg a, se hand zwenig meditiert. Se miasset no meh Gas geah, d Wealt isch
halt so schleacht ond dr Guru isch dr oinzig, der wo woiß, was zum do isch.
Der kut dann gau auf Deutschland, um seine Schäfla zum bsuche ond se mit großar Kraft aufzumlade. Do muss d
Mina drbei sei, des isch klar. Trommle, tanze ond meditiere isch voll agsagt. A bitzle was koscht des natürle
au, der Guru wohnt in am feine Hotel, do dät die Enerie besser fliesse. Aber Geald isch bei dr Mina ja do, ihr
Freind macht zwar it mit, zahlt ihr aber an sehr angenehme Lebensstil, zahlt alls fürs Kind ond macht allat
brav Kindsmagd Drhoin, well sui isch ja oft fut, um d Wealt zum rette. So hot kaum Zeit fürs Kind. Meditiere
sei iatz wichtiger, sait de Guru.

Se seal isch allat ozfriedener wore, obwohl se ja alls kriegt hot, was se welle hot. A flotts nuis Auto hot se
sich vom Freind kaufe lau, alls was se will ond braucht ond meh drzue. Wellaweags hot se dean Zore in sich it
wegbrocht, au wenn se no so viel meditiert hot. Es hot alls nix gnützt, es isch eher minder wore.

Des alls war lang her. Iatz isch se alt ond alloi, ihrem Freind hot se dann amole de Laufpass geabe, s nui Auto
hot se natürle bhalte. S Kind will nix meh von r wisse, dr Guru hot sich auf sei Südseeinsel zruckzoge. Ar hot
gmoint, se schafft s oifach it, se het zwenig kosmische Energie in sich. Do wiads halt nix meh mit Wealt rette.

So hockt se also do, hot nix ond niemed, isch vollar Wut ond Zore ond minder druff als je zuvor.
Wenn se zrucklueget, sieht s blos hoiße Luft.

Mei Rot für di isch folgendar:
sei zfriede, mit deam was du hosch, sei freindlich zu de Leit, sei bescheiden ond nutz andre it aus. Gib gean
ond viel, des macht s Leabe leichter. Moin it allat, du wärsch die wichtigscht Person auf dr Wealt ond alls
muss so sei, wei du grat wottesch.
Lies in dr Bibel ond los auf die Worte, dann brauchsch du koin Guru ond d Wealt wiad a kleins bitzle besser,
des isch gnue.