Allgäuer Philosophe-Däg: Koinar loset



Kennet ihr die Allgäuar Philosophe-Däg ? Noi ? Ja dann loset mol zue:

Schorsch ond Kare gand spaziere, meh amole s Remsar Tobel, des gfällt na halt allat guet. Am Stroßerand hinter Winterstette parket se, dann laufet se gmietlich de Fealdweg auf de Wald zue. Im Holz dinna gand se dann am Bächle noche, dur s Tobel dur. D Vögel pfeifet, verschiedene Pflanza duftet, die würzig Waldluft duet na guet. A gherigs Stuck weiter hinda gohts nochar steil auf Walkebearg nauf. Wenn a it zu woile lauft, isch des scho zum packe.
In Walkebearg an dr Kapelle hocket se aufs Bänkle ond machet - wie moischtens - a kleine Brotzeit.

Brotzeita geits zwoiarloi: kleine ond große. A kleine Brotzeit isch a Leaberkässemmel ond a Export. A große Brotzeit isch dann a Leaberkässemmel ond zwoi Export drzue. Die groß Brotzeit geits it so oft, well ma des Gwicht vo de Fläscha zescht amole die ganz Zeit aufm Buckl rumtrage muess, bevor s nochar dann gau leicher wiad.
Bei oinar Wanderung , wo dr Schorsch mole 4 Halbe in sein Rucksack dau hot, do isch m s dann scho noch oinar Stund z viel wore. Se hand glei brotzeite müsse ond sind nochar hoigange, well se vom Bier so miad wore sind, daß Weitergau numma in Frog komme isch. Seit deam neahmet se blos no a kleine Brozeit mit.

Zfriede genießet se die milde Sommerstimmung vom Namittag, der langsam auf de Obend zuegoht. Hinda, vo Isny her, zieht a schwaze Weatterwand rauf. Koi Wunder, well s au gar so schwüllig isch. M Schorsch passt des it so reacht, ar moint, se sottet ahebe meh nagau, bevor des Weatter näher kut.
Aber de Kare will no it, deam gfällts grad dohob. De Schorsch probierts noamole: "Komm, iatz sottet mer gau gau." De Kare sait aber nix, der lueget grad am Schumpe zue, wie der an am Ascht rumribset. - "Gell Kare, sche hammers dohob, aber do hinda kut frei a Sauweatter drher."
De Kare sait allat no nix, de Schump ribset weiter an deam Ascht. Do spickt de Schorsch m Kare mit de Finger ans Ohr, well ar woiß, daß ar des iberhaupts it hau ka. "Iatz, lass des, spinnsch denn ?"
kriegt ar au glei vom Kare zum höre. - "Ja wenn der Herr Schumpenbeobachter zu beschäftigt isch, zum mir a Antwort zum gea, dann muess i halt a wink nochehelfe," sait de Schorsch halbe beleidigt, "i moi eh, daß koinar auf mi loset, wenn i was sag, gell. Des isch frei a damisches Gfühl, wenn koinar loset." - "Ja, ja," sait de Kare erbar unintressiert und lueget weiter zum Schumpe num. Do isch iazt no oi Schump drzuekomme, iatz ribset se boide am Ascht.
De Schorsch sait nix meh, der isch iatz sehr.
"Des sind frei schlaue Viecher, die Schumpe, gell. Die wisset sich scho zum healfe, wenn se s reacht juckt." De Kare isch ganz begoischtret. De Schorsch sait nix.
Noch ar Weile kommet nummol zwoi Schumpe drzue. Iazt wend alle an deam Ascht rumriblse, deam wiad des aber scheints z bled ond ar bricht a. Zescht lueget die "schlaue" Schumpe no reacht depped, dann verschwindet se noranand, d Viehwoid na. "Hm, ganz so schlau sind se amend doch it, ha Schorsch ?" - Koi Antwort. De Kare merkt langsam, daß sei Freind beleidigt isch ond überlegt sich, was ar denn drgege do kinnt.

Do fällt m a Gschicht ei, die ar vorneacht glease hot. Die kinnt m Schorsch gau gfalle, ebbas über s Leabe, ebbs Philosophisches halt. Ar überlegt a Bitzle, dann fangt ar s Verzelle a:
"Es war amole a kloins Dörfle, do bei eis omanand, woisch, zu frühere Zeita, gell, do hots no koin Strom gea ond koine Autos. Aber um des gohts iatz gar it, sappradie, also, der kleine Fleacke isch vo am König mit ar große Armee agriffe wore. Well a Mauer um des Dörfle gweah isch, woisch, des hot ma friehner halt so ghet, gell, drum hot der König mit seine Soldate Belagerungsmaschina baut ond mit am moardsdrumm Rammbock sind se gege s Holzdor vo deam Dörfle agange.
Die paar Hansela in deam Dorf dinna, die hand natürle fiechtig Angscht ghet ond gege die Armee au nix ausrichte kenne, des isch ja klar. Lang hots it dauret ond des Dörfle isch blos no a rauchendar Schutthaufe gweah. Iatz kut aber des Verruckte an der Gschicht: in deam Dorf, do hätts oin arme, weise Ma gea, der hett gwisst, wie ma des Dorf hett rette kenne vor deam König mit seinar Armee. So gscheit ond weise isch der alt Kerle gweah. Des Hinderviehre war aber, daß dean koi Sau gfroget hot, well ar halt blos a armar, altar Ma war. Suscht wär des Dörfle it untergange. Koi Mensch hot an dean Alte denkt!
Was ka ma aus der Gschicht leane, ha ? Ganz klar: Weisheit ond gscheit sei isch zwar viel besser als stark sei, aber die Weisheit vo am arme Mensche wiad gar it beachtet, koinar froget drnoch, der hot halt nix zum sage. So isches, gell. Des gilt huitzedag au no, Schorsch.

Was saisch drzue ? Isch des it a gherige Gschicht ?"
Bevor de Schorsch, der scho beeindruckt war, was sage kenne hot, hot s an Blitzgar gea, an wilde Donnrar drzue on dann hots gsaicht, was ragange isch.
Die Zwie hand Glück ghet, well d Kapelle offe war, do sind se gschwind nei. Zwoi Stunda hand se wate miesse, bis des Sauweatter nocheglau hot. Nass wore sind se wellaweags no gherig, dr Reage hot it aufghert, bis se Drhoi waret.
Do hot dr Schorsch dann endlich meh was gsait:
"So, Kare, die Gschicht hot ja heit gnau passt, gell."