De gschpässig Schorsch - A Stoi im Schueh



Reageweatter. De Schorsch isch unterwegs, in de Fleacke na. Ar goht heit
Donnerstag Obend, Schofkopfobend. Wo ? In dr Sonne, z Altusried natürle, wo denn suscht ?
Am Katlartisch, glei links neabe dr Eingangstür hocket zwoi Gschtalta ond lueget ozfriede
in ihr Bierglas nei.
De Schorsch hot no Hoffnung, daß Sailars Fritz denn doch no käm. "Der kut eh allat a wink
später, gell", moint ar ond lueget zum Kare num. "Ond dann kinnt eis ja d Lizzy a a bitzle
aushelfe, des hot se ja scho öfter dau. Soo schleacht spielt se au it, die ka scho mithalte."
- "Jo, se woiss, daß d Ober Trümpf sind, aber suscht....", de Kare isch it reacht be-
goischtret. Er hot heit gar koin Schwung, sogar sei Durscht isch it so groß wie an andre Däg.

"Ja mei, Schmollars Edi kut mol heit gwis it. Der isch mit Frau ond Kind in Johresurlaub
gfahre, noch Südtirol, an de Kalterer See. Do wo alle Altusriedar im Sommer Urlaub machet. Do
deaf der natürle it fehle. Drum isch heit ja au nix los in dr Wiatschaft, well se alle fut
sind, dond am See. Beim Rotweischoppe hocket se ond wer woiß, ob se do dond it au Kate spielet
z Obend. Ond eis land se alloi Drhoi hocke. Also i woiss it: so a Urlaub, muess denn des sei?
I bi doch au s ganze Johr Drhoi ond denk mr nix." De Schorsch schüttlet sein Grind ond lueget
a bizle vorwurfsvoll de Kare a.
Der lachet ond sait: "Daß du nix denksch, des isch sowieso klar, aber lass die oine doch ihran
Urlaub mache. Erstens leab i mit mei m Reisebüro drvo ond zwoitens wänd halt die moischte
normale Leit au amol was andres seah, als blos Freibad, Oppreachts ond eisre zwoi große Kreis-
verkehr, gell. Die kommet alle dann meh gean hoi, wenn se gnue Rotwei gsoffe ond Speckknödel-
suppa geasse hand, do brauchsch koi Sorg hau."

So hocket se a Weile rum, jedar trinkt mol scho a dritte Halbe ond nix passiert.
"Also, dr Fritz kut heit au it, mit deam brauch mr numma reachne. Dann wiads nix mit ar gscheide
Schofkopfrunde." De Schorsch isch a wink enttäuscht.
"Mei, mir kinntet mit dr Heaz Sau spiele, aber i ha gar koi Luscht it, heit. Mir isch grad reacht,
so riebig, wie s isch. Die Schofkopferei isch doch allat au blos de gleiche Käs: ma sucht Saua,
geit Farba a, ond iamol zieht ma a Sole dur, gell. Was Nuis geits ja doch nie", brummlet de Kare.
De Schorsch ka gar it glaube, was de Kare eam do verzellt. De Kare war nämlich allat der Spielar,
wo am moischte Ehrgeiz ghet hot. Wie a kleins Kind hot ar sich über jedan Sieg gfreut ond jeds
Pünktle im Spiel gnau mitzellt. Do wiad de Schorsch eher misstrauisch, wenn ar sowas vom Kare hehrt.

"So, so, Kare, dann isch ja reacht, wenn de Schofkopf numma so wichtig isch. Blos komisch, daß du
des am letschte Donnerstag no ganz anders gseah hosch. Komm, raus mit dr Schproch, do stimmt doch
was it. Isch dr a Malheur passiert, hosch irgendwo Läscht oder Händel ? Mir kasch es ja sage, i
denn di guet gnue." De Schorsch ruckt a bizle näher an de Kare na.
Kare nimmt an Schluck ond sait: "Hosch reacht, Schorsch, es passt was it. Stell dr vor, mei Resi
hot mr letschtle d Floischkiachla abrenne lau ond des war ihr grad ganz glei. Sowas ha i no nie
verleabt. Ond s Feierobendbier hot se mir numma auf de Tisch gschtellt, des soll i ab iatz seal
aus m Keallar holle, stell dr vor. Ond se schwätzt wenig mit mir, wo se doch suscht allat d Babbl
aufghet hot. Des nimmt mi ganz sche mit. I woiß it, was i do soll. Ebbas passt it, amend ha i was
leatz gmacht ond ha s gar it gmerkt."
"Des isch natürle völlig ausgschlosse", moint de Schorsch ond grinst, "dass du mol was falsch
mache dätsch...du altar Lätsche." De Schorsch klopft m Kare auf d Schultar ond sait: "Iatz bass
auf, i verzell dr a Gschicht, was mir vor ar Weile passiert isch. Des kinnt dir helfe:

Vor a paar Wucha, an am wunderschöne Herbschtdag ha i mitm Peter, am alte Kamerade vo mir, a kleine
Bergtour gmachet.
Des isch halt mei Urlaub, gell. Wenn im Herbscht d Sonne neischeint, in die farbige Laubbäum ond d
Blätter leuchtet, mit am tiefblaue Himmel drhinter, des isch ja so a Pracht, do bin i jedsmole meh
begoischtret. Sette Dägla muss ma ausnutze, woll.
Suscht gang i gean mol auf de Piesekopf oder auf de Geisberg oder ins Gunzesriedar Tal nei, aber
desmole simmer doch glatt auf Gerstrube nauf. Mit m Bus hintre zum Christlesee ond dann über s
Hölltobel auf Gerstrube. Der Aufstieg do dur des Tobel isch ja scho derart sche, des isch schier
it zum beschreibe. Die Wasserfäll, des Liacht vo dr tiefstehende Sonne, wie die do neischeint, in
de Wald ond auf d Felse: also des sottesch du au mole seah, Kare. I sag dir, des sind Farba ond
Stimmunga, die vergisst ma nie meh."
"Ja, ja, do war i au scho amol, isch scho reacht. Aber schwätz mr it so viel omanand, was witt du
mir denn übehaupt sage ?" De Kare hot grad koin Bock auf diese Begeischtrungsausbrüche vom Schorsch.
Do ka der sich freie, wie a kleins Kind.

"Scho reacht, i komm do halt glei meh in a Begoischterung nei, wenn i blos dra denk. Also, mir sind
do doba isch au no offe gweah, zum Besichtige. Mir hands denn so gmacht, daß mr zescht amol des
alte Baurehaus aglueget hand. Des war so sche, so richtig alt inna ond ussa, grad aso wie mir seal
friehner ghauset hand. Oder vielleicht de Großvattr no. Mit der alte Frau, die do voanaduss a wink
auf des Haus aufpasset hot, hammer no an gherige Hoigate khet, die hot no meh vo Friehner gwisst,
als wie i, stell dr des vor."
"Aha, dann war seal Weibsbild no altmodischer als du, ja geits denn des!" Kare grinst.
"Du Lätsche, die war ja au viel älter als i, gell. Also, mir hand dann ausgmacht, dass mir no vor
m Eikhere a kleine Tour auf de Hahnekopf nauf machet. So simmer denn hintr dr Wiatschaft nauf-
gloffe, die Viehwoid nauf, in de Wald ond über s Gerstrubenar Älpele dann auf de Gipfel.
Mei, war des a schiene Aussicht vo doba, ond alls war so riebig, koi Sau omanand, ja des war sche.

Also guet, so sche au meh it, well i ha gherig Läscht mit meim linke Fuß ghet. Scho beim Loslaufe
vo Gerstrube aus hot s agfange, in meinem Fuß zum zwicke. I ha mir no nix denkt, aber des hot it
aufghert. Aus deam Zwicke isch a richtigs Steache wore. Mei Fuß hot me amend erbar ploget.
I ha halt probiert, hofele aufzumdappe, aber gholfe hot des it viel. Mir isch dann eigfalle, daß i
in dean Schueh letzle a nuie Eilagsohle neidau ha ond daß diseal mir iatz dean Wehdag machet.
Do wars mer klar, daß es nix nützt, de Schuh aufzumbinde ond neizumluege. Ond drum ha i des verreckte
Steache dann halt aushalte miasse. Au m Nawärts isch es it besser wore, sonder eher minder."
De Schorsch nimmt an gherige Schluck Bier ond verzieht grad s Gsicht, weil ar an die Gschicht hot
denke müsse.

"Aber Kare, iatz los her: well i dann Drhoi d Schueh rahdau ha, ha i gseah, daß do a kleins, spitzigs
Stoinle dinna war. I ha mi voll däuscht: des war ja gar it der Schueh mit dr nuie Eilagsohle, sondern
ganz oifach so a deppets Stoinle. So a Mischt, i hätt ja blos mole kuz nocheluege kenne, dann hätt i
mir die ganze Wehdäg spare könne, bei der Wanderung. Des hot mi dann scho gärgret, gell. So bled
musch mole sei, daß de moinsch, du woisch gwiss, was los isch ond vor lauter moine z bled bisch, zum
Nocheluege. Heidernei, des fuchset mi heit no a wink. "

De Kare lachet drecked ond moint: "Mei Schorsch, so bled kasch au blos du sei, gell. Jedar normalar
Mensch dät natürle zescht mole de Schueh ra, wenns zwickt, des isch doch klar!"
"So, moinsch du Kare ?" Schorsch lueget de Kare eigschnappet a. "Dann due no DU iatz gau dein Schueh
ra ond lueg noche, gell!"
"Was hosch gmoint ?" froget de Kare verschrocke.
"Ja, du sottesch iatz de Schueh rado ond nocheluege, was do so zwickt, bei deinar Resi. Iatz gohsch
heit friehner hoi ond frogesch se, worum es ihr grad it so gut goht, gell. So dät i sage."
Do hot de Kare zmole gmerkt, daß de Schorsch gar it so dumm isch, wie ma iamol denke kinnt.
Was do beim Kare ond dr Resi rauskomme isch, des bleibt leider privat.
Auf alle Fäll isch scheints alls meh reacht wore.