Weihnachtsgschenkla (16.10.2023)



Weihnächte, des duet mi schlauche
Ma hot doch alls ond ka nix brauche
Wie soll ma do no ebbas schenke
Wie ka i mir was Gscheits ausdenke ?

Krawatt ond Socka sind nie schleacht
Doch wie es machsch, es isch it reacht
Mol z groß, mol z klei ond d Farb passt it
Do kasch grad mache, was de witt

Vo deam, was kriegsch, do hosch scho drei
Ma beigets in de Kaschte nei
Oder wiaf dean Kruscht ganz oifach fut
Weil s nächst Johr eh meh s gleich Zuig kut

A Geald zum schenke, des isch in
Es macht halt blos glei gar koin Sinn
Du geisch an Schei, der kut retur
Des isch für d Katz, des lauft blos dur

Friehner hot ma gschenkt, was oinar brauche ka
Doch so ebbs kut heit it guet a
Aber i lass mi do it verdwirre
I schenk Schweineschmalz ond Bodebiera