Dr Vattr goht mol it in d Wiatschaft
Er sauft heit Drhoi
Dr Mutter passt des gar it nei
Se isch es gwehnt alloi
D Kinder gand in d hinter Kamar
Lueget reacht verdruckt
Se kommet mit am volle Maul
Ond Loiblesbrösel zruck
Es isch it so wie unterm Johr
Es isch a bsondre Zeit
Doran ka ma merke:
Weihnächte isch heit
Dr Chef, der nächt no goschet hot
Wiad zmol zum fromme Lamm
Dr Schlampar rummet endlich mol
Sein Saustall sauber zamm
Im Internet wiad bstellt wie bled
De allermindschte Kruscht
Beim Öko-Mensch geits ausnahmsweis
A bitzle Floisch ond Wuscht
Es isch it so wie unterm Johr
Es isch a bsondre Zeit
Doran ka ma merke:
Weihnächte isch heit
Z Obend hockt ma gmietlich zamm
Des dond alle Leit
Fresse, saufe, was grad goht
Ob s morge nix meh geit ?
Dass ma it viel schwätze muess
Do isch jedar froh
Dr Fernseh lauft im Hintergrund
Ond s Smartphone sowieso
Des isch doch grad wie unterm Johr
Des isch koi bsondre Zeit
Wie sche wär, wenn ma merke dät
Weihnächte isch heit
Wieder mal so n Weihnachtsgedicht....was solls...